പിറവം: പോസ്റ്റോഫീസ് ജംഗ്ഷനില് അമിത വേഗതയിലെത്തിയ മിനി ട്രാവലര് കാറിലും രണ്ടു ബൈക്കുകളിലും ഇടിച്ച് സമീപത്തുള്ള കടയിലേക്ക് ഇടിച്ചു കയറി.
കാര് ഡ്രൈവറായ കക്കാട് ചക്കുളങ്ങരയില് കുഞ്ഞപ്പനെ (54) പരിക്കുകളോടെ ആശുപത്രിയില് പ്രവേശിപ്പിച്ചു.
ത്രീറോഡ് ജംഗ്ഷനില്നിന്നു വന്ന ട്രാവലര് ഇടിയുടെ ആഘാതത്തില് നിയന്ത്രണംവിട്ട് തൊട്ടടുത്ത ഓണ്ലൈന് കംപ്യൂട്ടര് എന്ന സ്ഥാപനത്തിലേക്ക് മുന്നിലെ ചില്ലു ഗ്ലാസ് തകര്ത്ത് ഇടിച്ചുകയറി. ഇവിടെയുണ്ടായിരുന്ന കംപ്യൂട്ടറുകള്ക്കും മറ്റു സാമഗ്രികള്ക്കും നാശനഷ്ടം സംഭവിച്ചിട്ടുണ്ട്. വണ്വേ റോഡില്നിന്നു കയറി വന്ന കാറിന്റെ മുന്ഭാഗം തകര്ന്നിട്ടുണ്ട്. കടയുടെ മുന്നില് പാര്ക്ക് ചെയ്തിരുന്ന ബൈക്കുകളിലേക്കാണു ട്രാവലര് ഇടിച്ചുകയറിയത്. പിഒ ജംഗ്ഷനില് അപകടം തുടര്ക്കഥയാവുകയാണ്. മിക്ക ദിവസങ്ങളിലും അപകടങ്ങള് നടക്കുന്നുണ്ട്. നാലു റോഡുകള് സംഗമിക്കുന്ന കവലയില് അപകടങ്ങള് നിയന്ത്രിക്കാന് അധികൃതര് നടപടികളൊന്നും സ്വീകരിക്കുന്നില്ലെന്ന് ആക്ഷേപമുണ്ട്.