ആലപ്പുഴ: കാണാതായ ഹൗസ്ബോട്ട് ജീവനക്കാരനെ കായലിൽ മരിച്ച നിലയിൽ കണ്ടെത്തി. ചമ്പക്കുളം പഞ്ചായത്തിൽ അമച്ചകരി മുറിയിൽ കൊച്ചുമുണ്ടക്കൽ വീട്ടിൽ മാത്യു തോമസിനെയാണ് (33) കൈനകരി മുണ്ടയ്ക്കൽ പാലത്തിന് സമീപം മരിച്ച നിലയിൽ കണ്ടെത്തിയത്. വ്യാഴാഴ്ച രാത്രി 12 മണിയോടെ ഹൗസ്ബോട്ടിൽ നിന്നും വെള്ളത്തിൽ വീണ് അപകടം നടന്നതെന്നാണ് പ്രാഥമിക വിവരം. അന്നു രാത്രി മുതൽ ഇയാളെ കാണാതായിരുന്നു. തുടർന്ന് നടത്തിയ തിരച്ചിലിലാണ് മൃതദേഹം കണ്ടെത്തിയത്. മൃതദേഹം ആലപ്പുഴ മെഡിക്കൽ കോളജ് മോർച്ചറിയിലേക്ക് മാറ്റി. തോമസ് ജോസഫാണ് പിതാവ്. മാതാവ് അന്ന തോമസ്. ഭാര്യ ആൻസി. മകൾ ലിയാ മോൾ മാത്യു.