കണ്ണൂർ പൈസക്കരി: കോളേജിലേക്ക് വരുന്നതിനിടെ ബൈക്കിൽ നിന്നും തെറിച്ചുവീണ വിദ്യാർത്ഥി ടോറസ് ലോറി കയറി മരിച്ചു. കുടിയാൻമല പൊന്മല തട്ടുകുന്ന് തേവരയിൽ ആൽബിൻ ടി. വിത്സൺ (ആൽബിൻ തോമസ് - 19) ആണ് മരിച്ചത്. പൈസക്കരി ദേവമാതാ ആർട്സ് ആൻഡ് സയൻസ് കോളജിലെ ഒന്നാം വർഷ ബിസിഎ വിദ്യാർഥിയാണ്.
ചൊവ്വാഴ്ച രാവിലെ കോളേജിന് മുന്നിൽ വെച്ചായിരുന്നു ദാരുണമായ ഈ അപകടം സംഭവിച്ചത്. ബൈക്കിൽ കോളേജിലേക്ക് വരികയായിരുന്ന ആൽബിൻ റോഡിലേക്ക് തെറിച്ചുവീഴുകയും, തൊട്ടുപിന്നാലെ വന്ന ടോറസ് ലോറിയുടെ അടിയിൽപെടുകയുമായിരുന്നുവെന്നാണ് പ്രാഥമിക വിവരം. അപകടസ്ഥലത്തു വച്ചുതന്നെ ജീവൻ നഷ്ടപ്പെട്ടു.
മൃതദേഹം തുടർനടപടികൾക്കായി ആശുപത്രിയിലേക്ക് മാറ്റി. അപകടത്തെക്കുറിച്ച് പോലീസ് അന്വേഷണം ആരംഭിച്ചിട്ടുണ്ട്. പ്രിയ സഹപാഠിയുടെ അപ്രതീക്ഷിത വിയോഗത്തിന്റെ ഞെട്ടലിലും സങ്കടത്തിലുമാണ് പൈസക്കരി ദേവമാതാ കോളേജിലെ അധ്യാപകരും വിദ്യാർത്ഥികളും.