ഗൂഡല്ലൂർ: തമിഴ്നാട് ഗൂഡല്ലൂർ പാക്കണയിൽ കാട്ടാനയുടെ ആക്രമണത്തിൽ പതിനാലുകാരൻ കൊല്ലപ്പെട്ടു. പാക്കണ സ്വദേശിയായ പറക്കുന്നൻ ഹൗസ് ഷാജഹാന്റെ മകൻ മിസ്ഹബാണ് മരിച്ചത്.
രാത്രി എട്ട് മണിയോടെയായിരുന്നു ദാരുണമായ സംഭവം നടന്നത്. ടൗണിൽ നിന്നും വീട്ടിലേക്ക് നടന്നു വരികയായിരുന്ന മിസ്ഹബിനെ വഴിയിൽ വച്ച് കാട്ടാന ആക്രമിക്കുകയായിരുന്നുവെന്നാണ് വിവരങ്ങൾ. സംഭവസ്ഥലത്തു വച്ചുതന്നെ മരണം സംഭവിച്ചതായാണ് റിപ്പോർട്ടുകൾ സൂചിപ്പിക്കുന്നത്.
പ്രദേശത്ത് വന്യജീവി ശല്യം രൂക്ഷമാണെന്നും ജനങ്ങളുടെ സുരക്ഷ ഉറപ്പാക്കാൻ അധികൃതർ അടിയന്തരമായി ഇടപെടണമെന്നും ആവശ്യപ്പെട്ട് നാട്ടുകാർ രംഗത്തെത്തിയിട്ടുണ്ട്. മൃതദേഹം തുടർനടപടികൾക്കായി ആശുപത്രിയിലേക്ക് മാറ്റി. വനംവകുപ്പും പൊലീസും സ്ഥലത്തെത്തി മേൽനടപടികൾ സ്വീകരിച്ചു വരുന്നു.