കോട്ടയം: ജില്ലാ ആശുപത്രിക്ക് സമീപം അജ്ഞാത വാഹനം ഇടിച്ചു പരിക്കേറ്റ വീട്ടമ്മ മരിച്ചു. അമിത വേഗത്തിൽ എത്തിയ ബൈക്കാണ് രണ്ടു പേരെ ഇടിച്ചു തെറിപ്പിച്ചത്. മുണ്ടക്കയം ഇളങ്കാട് കൊച്ചുപറമ്പിൽ സുജാത വിജയൻ (57) ആണ് മരിച്ചത്. ഇവർക്കൊപ്പം റോഡ് മുറിച്ചു കടന്ന സാലി മോഹനെ (53) ഗുരുതര പരിക്കുകളോടെ കോട്ടയം മെഡിക്കൽ കോളേജിൽ പ്രവേശിപ്പിച്ചു. ഇവരെ ആദ്യം കോട്ടയം ജില്ലാ ജനറൽ ആശുപത്രിയിലും പിന്നീട് വിദഗ്ധ ചികിൽസയ്ക്കായി കോട്ടയം മെഡിക്കൽ കോളേജ് മാറ്റുകയായിരുന്നു.
ഇന്ന് ഉച്ചയോടെയായിരുന്നു അപകടം. ജില്ലാ ആശുപത്രിക്ക് മുന്നിൽ കെകെ റോഡ് മുറിച്ച് കടക്കാൻ ശ്രമിക്കുന്നതിനിടെ വേഗത്തിലെത്തിയ ഇരുചക്രവാഹനം ഇരുവരെയും ഇടിച്ചു തെറിപ്പിക്കുകയായിരുന്നു. ഇടിയുടെ ആഘാതത്തിൽ തെറിച്ചുവീണ ഇവരെ നാട്ടുകാരും പൊലീസും ചേർന്ന് ജില്ലാ ആശുപത്രിയിൽ പ്രവേശിപ്പിച്ചു. ഗുരുതരമായി പരിക്കേറ്റ ഇവർക്ക് വിദഗ്ധ ചികിത്സ നൽകിയെങ്കിലും മരണം സംഭവിക്കുകയായിരുന്നു.