കാസർകോട്: കാഞ്ഞങ്ങാട് സൗത്ത് ദേശീയപാതയിൽ നിയന്ത്രണം തെറ്റിയ ലോറി ഡിവൈഡറിൽ ഇടിച്ച് മറിഞ്ഞു. ബുധനാഴ്ച പുലർച്ചെയാണ് അപകടം. മംഗ്ളൂരു ഭാഗത്തേയ്ക്ക് പോവുകയായിരുന്നു ലോറി. കാഞ്ഞങ്ങാട് സൗത്തിൽ നിയന്ത്രണം തെറ്റിയ ലോറി ഡിവൈഡറിൽ ഇടിച്ചു മറിയുകയായിരുന്നു, ലോറി പൂർണ്ണമായും തകർന്നു. ഡ്രൈവറും ക്ലീനറും നിസാരപരിക്കുകളോടെ രക്ഷപ്പെട്ടു. ഡ്രൈവർ ഉറങ്ങിപ്പോയതാണ് അപകടകാരണമെന്ന് സംശയിക്കുന്നു.
നീലേശ്വരം, കരുവാച്ചേരിയിൽ ചൊവ്വാഴ്ച പുലർച്ചെ സമാന അപകടം ഉണ്ടായിരുന്നു. സർവ്വീസ് റോഡിൽ നിന്നു മെയിൻ റോഡിലേയ്ക്ക് കയറുന്നതിനിടയിൽ നിയന്ത്രണം വിട്ട ലോറിയാണ് അപകടത്തിൽപ്പെട്ടത്.
ഏതാനും ദിവസം മുമ്പ് കാസർകോട്, എരിയാൽ ദേശീയപാതയുടെ സർവ്വീസ് റോഡിൽ ഉണ്ടായ അപകടത്തിൽ ഒരു ഡസനിൽ ഏറെ ഇരു ചക്രവാഹനങ്ങളും നിരവധി ഇലക്ട്രിക് പോസ്റ്റുകളും തകർന്നിരുന്നു. എരിയാൽ അടിപ്പാതയ്ക്ക് സമീപത്ത് എത്തിയപ്പോൾ ഡ്രൈവർ ഉറങ്ങിയതോടെ നിയന്ത്രണം തെറ്റിയ ലോറി റോഡരുകിൽ പാർക്ക് ചെയ്തിരുന്ന ഇരുചക്രവാഹനങ്ങളിൽ ഇടിച്ചായിരുന്നു അപകടം.