കാട്ടാക്കട: തിരുവനന്തപുരത്ത് ഇരുചക്രവാഹനങ്ങൾ കൂട്ടിയിടിച്ചുണ്ടായ അപകടത്തിൽ യുവാവിന് ദാരുണാന്ത്യം. യുവാവിന്റെ പിന്നിൽ ഇരുന്നിരുന്ന അമ്മയെ ഗുരുതരമായ പരിക്കുകളോടെ സ്വകാര്യ ആശുപത്രിയിൽ പ്രവേശിപ്പിച്ചു.
ആര്യനാട് പള്ളിവേട്ട പത്മവിലാസത്തിൽ ഗോപന്റെയും സജിതാ റാണിയുടെയും മകൻ അതുൽ കൃഷ്ണൻ (21) ആണ് മരിച്ചത്. കാട്ടാക്കട-പൂവച്ചൽ റോഡിൽ നക്രാംചിറയ്ക്കടുത്തുള്ള വളവിൽ ഞായറാഴ്ച ഉച്ചയ്ക്ക് 1.30-ഓടെയാണ് അപകടം നടന്നത്.
അമ്മയുമായി സ്കൂട്ടറിൽ സഞ്ചരിക്കുകയായിരുന്നു അതുൽ. പെട്ടെന്ന് അമിത വേഗത്തിലെത്തിയ ബൈക്ക് സ്കൂട്ടറിൽ ഇടിക്കുകയായിരുന്നു. അതുലിന്റെ അമ്മ സജിതാ റാണി കാട്ടാക്കടയിലെ സ്വകാര്യ ആശുപത്രിയിൽ ചികിത്സയിൽ തുടരുകയാണ്.