മയ്യിൽ: നാറാത്ത് ആലിങ്കീഴിൽ ബൈക്കുകൾ കൂട്ടിയിടിച്ചുണ്ടായ അപകടത്തിൽ യുവാവ് ദാരുണമായി മരിച്ചു. കുറ്റിയാട്ടൂർ പഴശ്ശി വയക്കച്ചാൽ റോഡിലെ വി.കെ. ദിനിൽ (32) ആണ് മരിച്ചത്. വെള്ളിയാഴ്ച വൈകീട്ട് ആറുമണിയോടെ ചെറുവാക്കര ഗവ. എൽ.പി. സ്കൂളിനു മുന്നിലായിരുന്നു അപകടം.
കുറ്റിയാട്ടൂരിൽ നിന്ന് പുതിയതെരു ഭാഗത്തേക്ക് ബൈക്കിൽ പോകുകയായിരുന്നു ദിനിൽ. എതിർദിശയിൽ നിന്ന് വന്ന സ്കൂട്ടറുമായി കൂട്ടിയിടിച്ചാണ് അപകടം നടന്നത്. ഗുരുതരമായി പരിക്കേറ്റ ദിനിലിനെ ആശുപത്രിയിലേക്ക് കൊണ്ടുപോകും വഴി മരണം സംഭവിക്കുകയായിരുന്നു. ചെങ്കൽ ലോറിയിലെ ജീവനക്കാരനാണ് ഇദ്ദേഹം.
പിതാവ്: കാക്കാമണി ദിനേശൻ (ഓട്ടോ ടാക്സി ഡ്രൈവർ, എട്ടേയാർ).
മാതാവ്: വി.കെ. നളിനി.
സഹോദരങ്ങൾ: ദിപിന, ദിൽന (അധ്യാപിക, ശ്രീകണ്ഠാപുരം).
സംസ്കാരം ശനിയാഴ്ച നടക്കും.