പത്തനംതിട്ട: ജില്ലയിലെ ഏനാദിമംഗലം കുറുമ്പകരയിൽ ശ്രീകൃഷ്ണജയന്തി ആഘോഷങ്ങളുടെ ഭാഗമായുള്ള അനൗൺസ്മെന്റ് പ്രചാരണ വാഹനമിടിച്ച് വയോധികൻ മരിച്ചു. കുറുമ്പകര സ്വദേശി കൃഷ്ണനാണ് അപകടത്തിൽ ജീവൻ നഷ്ടപ്പെട്ടത്.
അനൗൺസ്മെന്റിനായി പ്രദേശത്തെത്തിയ ജീപ്പ് പിന്നോട്ടെടുക്കുന്നതിനിടെ റോഡരികിൽ നിൽക്കുകയായിരുന്ന കൃഷ്ണനെ ഇടിക്കുകയായിരുന്നു. ഇടിയുടെ ആഘാതത്തിൽ ഗുരുതരമായി പരിക്കേറ്റ ഇദ്ദേഹത്തെ ഉടൻ തന്നെ അടുത്തുള്ള ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല.
സംഭവത്തിൽ അടൂർ പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. മൃതദേഹം പോസ്റ്റ്മോർട്ടം നടപടികൾക്കായി ആശുപത്രി മോർച്ചറിയിലേക്ക് മാറ്റി.