കുന്നമംഗലം: കോഴിക്കോട്–താമരശ്ശേരി റോഡിൽ കുന്നമംഗലം എച്ച്.പി. പെട്രോൾ പമ്പിന് സമീപം നിർത്തിയിട്ടിരുന്ന വാഹനങ്ങളിലേക്ക് നിയന്ത്രണം വിട്ട കണ്ടെയ്നർ ലോറി ഇടിച്ചുകയറി അപകടം. അപകടത്തിൽ കാർ ഡ്രൈവറായ കുന്നമംഗലം എം.എൽ.എ. റോഡ് സ്വദേശി ഹാരിസിന് പരിക്കേറ്റു. ഇദ്ദേഹത്തെ വെള്ളിമാടുകുന്ന് നിർമ്മല ആശുപത്രിയിൽ പ്രവേശിപ്പിച്ചു.
വ്യാഴാഴ്ചയായിരുന്നു സംഭവം. റോഡരികിൽ നിർത്തിയിട്ടിരുന്ന നീല ബലേനോ കാറിലും (KL 59 X 4244), ഓട്ടോറിക്ഷയിലുമാണ് (KL 10 AW 4526) ലോറി ഇടിച്ചത്. ഇടിയുടെ ആഘാതത്തിൽ ബലേനോ കാറിന്റെ പിൻഭാഗവും വശങ്ങളും തകർന്നു.
ലോറിയിടിച്ചതിനെ തുടർന്ന് തെറിച്ചുപോയ ഓട്ടോറിക്ഷ സമീപത്തെ വൈദ്യുതത്തൂണിൽ ഇടിച്ചാണ് നിന്നത്. ഓട്ടോറിക്ഷ പൂർണമായും തകർന്ന നിലയിലാണ്. അപകടസമയത്ത് ഓട്ടോറിക്ഷയിൽ യാത്രക്കാർ ഇല്ലാതിരുന്നതിനാൽ വൻ ദുരന്തം ഒഴിവായി.
സംഭവത്തെ തുടർന്ന് പോലീസും പ്രാദേശിക രക്ഷാപ്രവർത്തകരും സ്ഥലത്തെത്തി ഗതാഗതം പുനഃസ്ഥാപിക്കുകയും തുടർനടപടികൾ സ്വീകരിക്കുകയും ചെയ്തു.