പുനലൂര്: തമിഴ്നാട്ടില് കൊല്ലം-തിരുമംഗലം ദേശീയ പാതയിലൂടെ കടന്ന് വന്ന ടോറസ് ലോറി നിയന്ത്രണം വിട്ട് ഇറച്ചിക്കടയില് ഇടിച്ചുകയറി 3 പേര്ക്ക് നിസാര പരിക്കേറ്റു.
ഇന്നലെ രാവിലെ 8.15 ഓടെ ദേശീയ പാതയിലെ ഉറുകുന്ന് ലൂര്ദ്മാത പള്ളിക്ക് പടിഞ്ഞാറ് ഭാഗത്തായിരുന്നു അപകടം നടന്നത്. തമിഴ്നാട്ടില് നിന്ന് കേരളത്തിലേക്ക് പാറപ്പൊടി കയറ്റിയെത്തിയ ടോറസ് ലോറി പാതയോരത്ത് നിന്ന വൈദ്യുതി പോസ്റ്റും ഇടിച്ച് തകര്ത്തുകൊണ്ടാണ് ഇരുമ്ബ് ഷീറ്റ് മേഞ്ഞ ഇറച്ചിക്കടയില് കയറിയത്. കട ഉടമ ഉണ്ണിയും ഇറച്ചി വാങ്ങാനെത്തിയ മറ്റ് രണ്ടുപേര്ക്കുമാണ് നിസാര പരിക്കുകളോടെ രക്ഷപ്പെട്ടത്. സംഭവ സമയത്ത് കട ഉടമ ഇറച്ചിക്കടക്കുള്ളില് ഉണ്ടായിരുന്നെങ്കിലും നിസാര പരിക്കുകളോടെ അത്ഭുതകരമായി രക്ഷപ്പെടുകയായിരുന്നു. വൈദ്യുതി പോസ്റ്റില് വാഹനം ഇടിച്ച് കയറുന്നതിനിടെ ബ്രേക്ക് ചവുട്ടിയെങ്കിലും ടോറസ് പാഞ്ഞു കയറി കട പൂര്ണമായും നിലം പൊത്തുകയായിരുന്നു. സംഭവം കണ്ട സമീപ വാസികള് ഓടിക്കൂടി എല്ലാവരെയും രക്ഷപ്പെടുത്തി ഇലക്ട്രിക് പോസ്റ്റ് തകര്ന്നതിനെ തുടര്ന്ന് പ്രദേശത്തെ വൈദ്യുതി ബന്ധം താറുമാറായി. തെന്മല പൊലീസും കെ.എസ്.ഇ.ബി അധികൃതരും സ്ഥലത്തെത്തി മേല്നടപടികള് സ്വീകരിച്ചു.