കോഴിക്കോട്: നിയന്ത്രണം വിട്ട ബസ് മരത്തിലിടിച്ച് പതിനൊന്ന് പേര്ക്ക് പരിക്ക്. താമരശ്ശേരി കോഴിക്കോട് റൂട്ടിലോടുന്ന സിൻഡിക്കേറ്റ് ബസ് ആണ് അപകടത്തില്പ്പെട്ടത്.
കോഴിക്കോട് കോട്ടൂളിയില് വച്ച് രാവിലെ 7.30ഓടെയാണ് അപകടമുണ്ടായത്.
എതിര്ദിശയിലേക്ക് കയറിക്കൊണ്ടാണ് ബസ് മരത്തിലിടിക്കുന്നത്. ബസ് വരുന്നത് കണ്ട് സ്കൂള് ബസിനായി കാത്തുനിന്ന കുട്ടികളുള്പ്പടെയുള്ളവരുമായി രക്ഷിതാക്കള് ഓടിമാറുന്നതായി സിസിടിവി ദൃശ്യങ്ങളില് കാണാം. മെഡിക്കല് കോളജ് ഭാഗത്തേക്ക് പോവുകയായിരുന്ന ഒരു ഓട്ടോ പട്ടേരിയില് വെച്ച് യൂടേണ് എടുക്കുന്നതായി ദൃശ്യങ്ങളിലുണ്ട്. ഇതേത്തുടര്ന്ന് പെട്ടന്ന് ബ്രേക്കിട്ടതാകാം അപകടകാരണമെന്നാണ് വിവരം. ബ്രേക്ക് കിട്ടാതെ വന്നതോടെ ബസ് നിയന്ത്രണം വിട്ട് മരത്തിലിടിക്കുകയായിരുന്നു.
സ്കൂളിലേക്കും ഓഫീസിലേക്കും പോകാനിറങ്ങിയവരായിരുന്നു ബസില് അധികവും. കഴിഞ്ഞ ദിവസങ്ങളിലെല്ലാം തന്നെ ബസുകളിലെ ടയറുകളുടെയും മറ്റും പ്രശ്നങ്ങളെക്കുറിച്ച് വ്യാപക പരാതികളുയര്ന്നിരുന്നു. ഈ റൂട്ടിലോടുന്ന ബസുകളെല്ലാം അമിതവേഗത്തിലാണെന്നും നിരവധി പരാതികളുണ്ട്.