തിരുവനന്തപുരം വിഴിഞ്ഞം: പുതിയതുറയില്‍ മീൻ പിടിക്കാൻ പുറപ്പെട്ട വള്ളം ശക്തമായ തിരയില്‍പ്പെട്ട് മറിഞ്ഞു. ഒരാള്‍ മരിച്ചു , മൂന്ന് പേര്‍ നീന്തി രക്ഷപ്പെട്ടു.
പുതിയതുറ ആഴാങ്കല്‍ പുരയിടത്തില്‍ കുഞ്ഞുമോൻ എന്ന് വിളിക്കുന്ന അലോഷ്യസ് (47) ആണ് മരിച്ചത്. സഹപ്രവര്‍ത്തരും പുതിയതുറ സ്വദേശികളുമായ ക്രിസ്തുദാസ് , ജോണ്‍സണ്‍, സേവ്യര്‍ എന്നിവര്‍ നീന്തി രക്ഷപെട്ടു.
വള്ളത്തിനും എഞ്ചിനും കേടുപാടുണ്ടായി. ഇന്നലെ വൈകുന്നേരം പുതിയതുറ തീരത്തിന് സമീപമായിരുന്നു അപകടം. തിരയടിയില്‍ മറിഞ്ഞ വള്ളത്തിനടിയില്‍പ്പെട്ട അലോഷ്യസിനെ ഉടന്‍തന്നെ കൂടെയുളളവര്‍ കരയ്ക്കെത്തിച്ച്‌ പുല്ലുവിള സര്‍ക്കാര്‍ ആശുപത്രിയില്‍ എത്തിച്ചു. പിന്നീട് അവിടെ നിന്നും നെയ്യാറ്റിൻകര സ്വകാര്യ ആശുപത്രിയില്‍ എത്തിച്ചെങ്കിലും ജീവൻ രക്ഷിക്കാനായില്ല.
മണ്‍സൂണ്‍ സീസണില്‍ പുതിയതുറ തീരത്ത് നിര്‍ത്തി വച്ചിരുന്ന മീൻ പിടിത്തം ഒരാഴ്ച മുൻപാണ് പുനരാരംഭിച്ചത്. രാവിലെ കുറച്ച്‌ ശാന്തമായിരുന്ന കടല്‍ത്തിരകള്‍ പെട്ടെന്ന് ശക്തമായതാണ് അപകടത്തിന് കാരണമായതെന്ന് മത്സ്യത്തൊഴിലാളികള്‍ പറയുന്നു.