ആലപ്പുഴ പൂച്ചാക്കല്: സ്കൂട്ടറും മിനി വാനും കൂട്ടിയിടിച്ചുണ്ടായ അപകടത്തില് 20കാരൻ മരിച്ചു. ബിജെപി സംസ്ഥാന കൗണ്സില് അംഗവും ചേര്ത്തല കോടതിയിലെ അഭിഭാഷകനുമായ ചേര്ത്തല പാണാവള്ളി പഞ്ചായത്ത് പതിനഞ്ചാം വാര്ഡില് കൃഷ്ണ ജ്യോതിയില് ബി. ബാലാനന്ദിന്റെ മകൻ കൃഷ്ണാനന്ദ്(20) ആണ് മരിച്ചത്.
വ്യാഴാഴ്ച ഉച്ചകഴിഞ്ഞ് മൂന്നരയോടെ ചേര്ത്തല ചെങ്ങണ്ട പാലത്തിന് സമീപമാണ് അപകടം നടന്നത്. കൃഷ്ണാനന്ദ് സഞ്ചരിച്ചിരുന്ന സ്കൂട്ടറും മിനി വാനും കൂട്ടിയിടിക്കുകയായിരുന്നു. നിയന്ത്രണം വിട്ട വാഹനം മറ്റൊരു സ്കൂട്ടറിലും ഇടിച്ചു.
അപകടത്തില് സ്കൂട്ടര് യാത്രക്കാരായ മറ്റ് രണ്ട് യുവാക്കള്ക്കും പരിക്കുണ്ട്. ഇവരില് ഒരാളെ കോട്ടയം മെഡിക്കല് കോളജിലും ഒരാളെ ചേര്ത്തല താലൂക്കാശുപത്രിയിലും പ്രവേശിപ്പിച്ചു. റോഡിലേക്ക് തെറിച്ചു വീണ കൃഷ്ണാനന്ദിനെ എറണാകുളം ലേക്ഷോര് ആശുപത്രിയില് പ്രവേശിപ്പിച്ചെങ്കിലും രക്ഷിക്കാനായില്ല.
കാലടി ആദിശങ്കര എൻജിനിയറിംഗ് കോളജിലെ ബയോ മെഡിക്കല് വിദ്യാര്ത്ഥിയാണ്. ശ്രീകണ്ഠേശ്വരം എസ്എൻഡിഎസ്വൈ യുപിസ്കൂള് അധ്യാപിക ദീപയാണ് അമ്മ. ജ്യോതിലക്ഷ്മി സഹോദരി. മൃതദേഹം സംസ്കരിച്ചു.