കൊല്ലം കൊട്ടാരക്കരയിൽ കാറപകടത്തിൽ യുവാവിന് ദാരുണാന്ത്യം. പുത്തൂർ വൈശാഖത്തില് അനു വൈശാഖ് (26) ആണ് മരിച്ചത്. നിയന്ത്രണം വിട്ട കാർ ഇലട്രിക് പോസ്റ്റ് തകർത്ത് തോട്ടിലേക്ക് മറിയുകയായിരുന്നു. തിങ്കളാഴ്ച പുലർച്ചെ രണ്ടു മണിയോടെയായിരുന്നു അപകടം. കൊട്ടാരക്കര ഭാഗത്തു നിന്ന് അടൂര് ഭാഗത്തേക്ക് പോകുന്നവഴി എംസി റോഡിൽ ഇഞ്ചക്കാട് കോടിയാട്ട് ക്ഷേത്രത്തിന് സമീപമെത്തിയപ്പോളാണ് കാർ നിയന്ത്രണം വിട്ടത്.
രണ്ടു ഇലട്രിക് പോസ്റ്റുകളും ക്ഷേത്രത്തിന്റെ ബോര്ഡുകളിലും ഇടിച്ച ശേഷം കാർ തോടിന്റെ വശത്തേക്ക് മറിയുകയായിരുന്നു. ഡ്രൈവിങ്ങിനിടെ ഉറങ്ങിപ്പോയതാണ് അപകടകാരണമെന്നാണ് പ്രാഥമിക നിഗമനം. നാട്ടുകാരും വഴിയാത്രക്കാരും കാര് വെട്ടിപ്പൊളിച്ചാണ് ഗുരുതരമായി പരിക്കേറ്റ അനുവിനെ പുറത്തെടുത്തത്. ഉടൻ ആശുപത്രിയില് എത്തിച്ചെങ്കിലും മരണപ്പെടുകയായിരുന്നു.
അപകടത്തെ തുടർന്ന് രാത്രി രണ്ടുമണിമുതല് പ്രദേശത്ത് വൈദ്യുതി തടസ്സപ്പെട്ടു. സംഭവത്തിൽ പോലീസ് കേസെടുത്ത്. കാർ അമിത വേഗതയിലായിരുന്നെന്ന് ദൃക്സാക്ഷികൾ പറഞ്ഞു. അപകടത്തില് ഒരു ലക്ഷത്തിലേറെ രൂപയുടെ നാശനഷ്ടം ഉണ്ടായിട്ടുണ്ടന്ന് കെഎസ്ഇബി അറിയിച്ചു.