തൃശ്ശൂർ കുന്നംകുളം കാണിപ്പയ്യൂരിൽ ആംബുലൻസും കാറും കൂട്ടിയിടിച്ചുണ്ടായ അപകടത്തിൽ പരുക്കേറ്റ് ചികിത്സയിലായിരുന്നയാൾ മരിച്ചു. കുനംമൂച്ചി കൂത്തൂർ കൊച്ചപ്പൻ മകൻ ആന്റണി (59)യാണ് മരിച്ചത്. അപകടത്തിൽ ഗുരുതരമായി പരുക്കേറ്റ് അമല മെഡിക്കൽ മിഷൻ ആശുപത്രിയിലെ തീവ്ര പരിചരണ വിഭാഗത്തിൽ ചികിത്സയിലായിരുന്നു. ഇതോടെ ഈ അപകടത്തിലെ മരണം മൂന്നായി. ആന്റണിയുടെ ഭാര്യ പുഷ്പ (56) യും ആംബുലൻസിലുണ്ടായിരുന്ന രോഗി കണ്ണുർ സ്വദേശി കുഞ്ഞിരാമനും (86) മരിച്ചിരുന്നു.
കുന്നംകുളം ഭാഗത്ത് നിന്ന് വന്ന ആന്റണിയും ഭാര്യ പുഷ്പയും സഞ്ചരിച്ച കാർ നിയന്ത്രണം വിട്ട് എതിരെ വന്നിരുന്ന ആംബുലൻസിൽ ഇടിക്കുകയായിരുന്നു. ഇടിയുടെ ആഘാതത്തിൽ ആംബുലൻസ് റോഡിൽ മറിഞ്ഞാണ് രോഗിയായ കുഞ്ഞിരാമൻ മരിച്ചത്. ആംബുലൻസിലുണ്ടായിരുന്ന ഡ്രൈവർക്കും നഴ്സിനും രോഗിയുടെ ബന്ധുക്കൾക്കും പരുക്കേറ്റിരുന്നു. ആന്റണിയുടെ സംസ്കാരം ഇന്ന് രാവിലെ കൂനംമൂച്ചി സെന്റ് സേവിയേഴ്സ് ദേവാലയ സെമിത്തേരിയിൽ നടക്കും.