പാലക്കാട് മലമ്പുഴ: മലമ്പുഴ ഡാമിൽ ഇറങ്ങിയ തിരൂർ സ്വദേശിയായ യുവാവിനെ കാണാതായി. തിരൂരിൽ നിന്ന് വിനോദയാത്രയ്ക്ക് എത്തിയ പത്തംഗ സംഘത്തിലെ ഷഹീലിനെയാണ് കാണാതായത്.
ഇന്ന് വൈകുന്നേരം അഞ്ച് മണിയോടെയാണ് സംഭവം നടന്നത്. സംഘം ഡാമിൽ ഇറങ്ങിയ സമയം ഷഹീലിനെ കാണാതാവുകയായിരുന്നു. ഉടൻതന്നെ ഇവർ നാട്ടുകാരെ വിവരമറിയിച്ചു. തുടർന്ന് ഫയർഫോഴ്സും നാട്ടുകാരും സംയുക്തമായി സ്ഥലത്ത് തിരച്ചിൽ നടത്തിയെങ്കിലും യുവാവിനെ കണ്ടെത്താനായില്ല.
വെളിച്ചം മങ്ങിയതിനെത്തുടർന്ന് ഇന്നത്തെ തിരച്ചിൽ നിർത്തിവെച്ചു. നാളെ രാവിലെ ഫയർഫോഴ്സിന്റെ നേതൃത്വത്തിൽ തിരച്ചിൽ പുനരാരംഭിക്കും.