മലക്കപ്പാറ: തൃശൂർ മലക്കപ്പാറയിലെ തോട്ടപ്പുര വ്യൂ പോയിന്റിൽ നിന്ന് 30 അടി താഴ്ചയിലേക്ക് വീണ വിനോദസഞ്ചാരിയെ പോലീസ്, വനം വകുപ്പ്, നാട്ടുകാർ എന്നിവർ ചേർന്ന് അതിസാഹസികമായി രക്ഷപ്പെടുത്തി. പാവറട്ടി സ്വദേശിയായ അർജുനെയാണ് മണിക്കൂറുകൾ നീണ്ട പരിശ്രമത്തിനൊടുവിൽ സുരക്ഷിതമായി പുറത്തെത്തിച്ചത്.
ഇന്ന് ഉച്ചയ്ക്ക് ഒരു മണിയോടെയായിരുന്നു സംഭവം. അതിരപ്പിള്ളിയിൽ നിന്ന് മലക്കപ്പാറ ഭാഗത്തേക്ക് വരികയായിരുന്ന പാവറട്ടി സ്വദേശികളുടെ സംഘം തോട്ടപ്പുര വ്യൂ പോയിന്റിന് സമീപം വാഹനം നിർത്തി പുറത്തിറങ്ങിയതായിരുന്നു. കാഴ്ചകൾ ആസ്വദിക്കുന്നതിനിടെ അർജുൻ അബദ്ധത്തിൽ റോഡരികിൽ നിന്ന് 30 അടി താഴ്ചയുള്ള കൊക്കയിലേക്ക് വീഴുകയായിരുന്നു.
വിവരം അറിഞ്ഞ ഉടൻ തന്നെ മലക്കപ്പാറ എസ്.ഐ ജയ്സന്റെ നേതൃത്വത്തിലുള്ള പോലീസ് സംഘവും, വനം വകുപ്പ് വാച്ചർ ഗിരീഷും സ്ഥലത്തെത്തി. ഇവരോടൊപ്പം വിനോദസഞ്ചാരികളുടെ വാഹനമോടിച്ചിരുന്ന ഡ്രൈവർ അനുരാജും ചേർന്നാണ് രക്ഷാപ്രവർത്തനം നടത്തിയത്. ഏറെ ശ്രമകരമായ ദൗത്യത്തിനൊടുവിൽ അർജുനെ താഴെ നിന്ന് പുറത്തെത്തിക്കുകയായിരുന്നു.
അപകടത്തിൽ നിസ്സാര പരിക്കുകൾ മാത്രമാണ് അർജുന് ഉള്ളത്. ഉടൻ തന്നെ അദ്ദേഹത്തെ ചികിത്സയ്ക്കായി ആശുപത്രിയിലേക്ക് മാറ്റി. വിനോദസഞ്ചാര കേന്ദ്രങ്ങളിൽ സന്ദർശനം നടത്തുമ്പോൾ വിനോദസഞ്ചാരികൾ അതീവ ജാഗ്രത പാലിക്കണമെന്നും, സുരക്ഷാ മുൻകരുതലുകൾ കർശനമായി പാലിക്കണമെന്നും അധികൃതർ മുന്നറിയിപ്പ് നൽകുന്നു.