തൃശ്ശൂർ വടക്കേക്കാട്: കുളത്തിൽ കുളിക്കാനിറങ്ങിയ പതിമൂന്നുകാരൻ മുങ്ങിമരിച്ചു. വടക്കേ പുന്നയൂർ കൊന്നാമാക്കൽ സുലൈമാൻകുട്ടിയുടെ മകൻ മുഹമ്മദ് ഫർഹാൻ (13) ആണ് മരിച്ചത്. തൊഴിയൂർ റഹ്മത്ത് സ്കൂൾ വിദ്യാർത്ഥിയാണ്.
ഞായറാഴ്ച വൈകീട്ട് നാലരയോടെ കെട്ടുങ്ങൽപീടികക്ക് കിഴക്കായുള്ള കാർത്തിപുള്ളി കുളത്തിൽ കൂട്ടുകാരുമൊത്ത് കുളിക്കാനിറങ്ങിയപ്പോഴായിരുന്നു അപകടം. കുളത്തിലേക്ക് ചാടിയ ഫർഹാൻ വെള്ളത്തിൽ നിന്ന് ഉയർന്നു വരാതിരുന്നതിനെ തുടർന്ന് കൂടെയുണ്ടായിരുന്ന കുട്ടികൾ വിവരമറിയിച്ചതിൻപ്രകാരം നാട്ടുകാർ ഓടിയെത്തുകയായിരുന്നു.
ഉടൻ തന്നെ നാട്ടുകാർ ചേർന്ന് കുട്ടിയെ വെള്ളത്തിൽ നിന്ന് പുറത്തെടുത്ത് കുന്നംകുളം ദയ റോയൽ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. വിവരമറിഞ്ഞ് ഗുരുവായൂരിൽ നിന്ന് ഫയർഫോഴ്സും സ്ഥലത്തെത്തിയിരുന്നു.
മാതാവ്: ഷഹാന
സഹോദരങ്ങൾ: ഫറാസ്, ഫർസാന
