കൊല്ലം: ശൂരനാട്ട് വിനോദയാത്ര കഴിഞ്ഞ് മടങ്ങിയെത്തിയ ഒൻപതുകാരൻ വാഹനാപകടത്തിൽ ദാരുണമായി മരണപ്പെട്ടു. ശൂരനാട് തെക്ക് ഇരവിച്ചിറ കിഴക്ക്, ആഹിൽ മൻസിലിൽ നവാസ് - അനീഷ ദമ്പതികളുടെ മകൻ ആഹിൽ മുഹമ്മദ് (9) ആണ് നാടിനെ കണ്ണീരിലാഴ്ത്തി വിടപറഞ്ഞത്.
തെങ്ങുംവിള ജുമാ മസ്ജിദിന് സമീപം വ്യാഴാഴ്ചയായിരുന്നു നാടിനെ ഞെട്ടിച്ച ഈ ദുരന്തം ഉണ്ടായത്. മദ്രസ വിദ്യാർത്ഥികളുടെ വിനോദയാത്ര കഴിഞ്ഞ് ബസിൽ മടങ്ങിയെത്തിയതായിരുന്നു ആഹിൽ. ബസിൽ ചെരിപ്പ് മറന്നുവെച്ചതായി മനസ്സിലാക്കിയ കുട്ടി, അത് എടുക്കാനായി തിരികെ ബസിലേക്ക് കയറി. ചെരിപ്പുമായി പുറത്തിറങ്ങി റോഡ് മുറിച്ചുകടക്കുന്നതിനിടെ അതിവേഗത്തിലെത്തിയ കാർ കുട്ടിയെ ഇടിക്കുകയായിരുന്നു.
ഗുരുതരമായി പരിക്കേറ്റ ആഹിലിനെ ഉടൻ തന്നെ കൊട്ടിയത്തെ സ്വകാര്യ ആശുപത്രിയിൽ പ്രവേശിപ്പിച്ചു. ജീവൻ രക്ഷിക്കാൻ ഡോക്ടർമാർ പരമാവധി ശ്രമിച്ചെങ്കിലും, ചികിത്സയിലിരിക്കെ വ്യാഴാഴ്ച വൈകിട്ട് നാല് മണിയോടെ കുട്ടി മരണത്തിന് കീഴടങ്ങി.
അസ്ന, അമൽ എന്നിവരാണ് ആഹിലിന്റെ സഹോദരങ്ങൾ. കുടുംബത്തിന്റെ എല്ലാമെല്ലാമായ പ്രതീക്ഷയായിരുന്ന ആ കുഞ്ഞിന്റെ അപ്രതീക്ഷിത വിയോഗം ശൂരനാട് പ്രദേശത്തെയാകെ കടുത്ത ദുഃഖത്തിലും മരവിപ്പിലുമാണ് ആഴ്ത്തിയിരിക്കുന്നത്.