കോട്ടയം: കോട്ടയം ജില്ലാ ജനറൽ ആശുപത്രിക്ക് സമീപമുള്ള ചന്തക്കവലയിൽ ബസ് കാത്തുനിന്ന യാത്രക്കാർക്കിടയിലേക്ക് സ്വകാര്യ ബസ് ഇടിച്ചുകയറി അഞ്ചുപേർക്ക് പരിക്ക്. വെള്ളിയാഴ്ച വൈകുന്നേരം 7:10 ഓടെയായിരുന്നു അപകടം. 'തണ്ടപ്ര' എന്ന് പേരുള്ള സ്വകാര്യ ബസാണ് അപകടത്തിൽപ്പെട്ടത്.
പരിക്കേറ്റവരിൽ രണ്ടുപേരുടെ നില ഗുരുതരമാണ്. ഇവരെ അടിയന്തര വിദഗ്ധ ചികിത്സയ്ക്കായി കോട്ടയം മെഡിക്കൽ കോളേജ് ആശുപത്രിയിലേക്ക് മാറ്റി. മറ്റു പരിക്കേറ്റവരെ സമീപത്തെ ജനറൽ ആശുപത്രിയിൽ പ്രവേശിപ്പിച്ചു.
വൈകുന്നേരം ആളുകൾ തിങ്ങിനിറഞ്ഞുനിന്ന സമയത്തായിരുന്നു അപ്രതീക്ഷിതമായി അപകടം നടന്നത്. വിവരമറിഞ്ഞയുടൻ പോലീസും നാട്ടുകാരും ചേർന്ന് ഉടൻതന്നെ രക്ഷാപ്രവർത്തനം നടത്തുകയും പരിക്കേറ്റവരെ ആശുപത്രിയിൽ എത്തിക്കുകയും ചെയ്തു. അപകടത്തിലേക്ക് നയിച്ച കാരണം സംബന്ധിച്ച് പോലീസ് അന്വേഷണം ആരംഭിച്ചിട്ടുണ്ട്.