പാലക്കാട്: തച്ചമ്പാറ പാലക്കയം ഭാഗത്തുനിന്നും കാണാതായ വയോധികയെ വാക്കോടൻ മലയിൽ മരിച്ച നിലയിൽ കണ്ടെത്തി. കാഞ്ഞിരപ്പുഴ പാലക്കയം കൊരക്കലായിൽ അന്നമ്മ എബ്രഹാം (75) ആണ് മരിച്ചത്. മൃതദേഹത്തിന് ദിവസങ്ങളോളം പഴക്കമുണ്ടെന്നാണ് പ്രാഥമിക നിഗമനം.
കഴിഞ്ഞ മാർച്ച് 4 മുതൽ അന്നമ്മയെ വീട്ടിൽ നിന്നും കാണാതായിരുന്നു. ബന്ധുക്കളും നാട്ടുകാരും പോലീസും ചേർന്ന് പ്രദേശത്ത് ദിവസങ്ങളായി വ്യാപകമായ തിരച്ചിൽ നടത്തിവരികയായിരുന്നു. വ്യാഴാഴ്ച വാക്കോടൻ മലയിലെ ഉൾപ്രദേശത്ത് നടത്തിയ പരിശോധനയിലാണ് മൃതദേഹം കണ്ടെത്തിയത്.
മൃതദേഹം അഴുകിയ നിലയിലായതിനാൽ മരണപ്പെട്ട് ദിവസങ്ങൾ കഴിഞ്ഞിട്ടുണ്ടാകാമെന്നാണ് കരുതുന്നത്. സംഭവസ്ഥലത്ത് പോലീസ് എത്തി ഇൻക്വസ്റ്റ് നടപടികൾ പൂർത്തിയാക്കി. മരണകാരണം സംബന്ധിച്ച കൂടുതൽ വ്യക്തതയ്ക്കായി മൃതദേഹം പോസ്റ്റ്മോർട്ടത്തിനായി ജില്ലാ ആശുപത്രിയിലേക്ക് മാറ്റി. സംഭവത്തിൽ പോലീസ് കൂടുതൽ അന്വേഷണം നടത്തിവരികയാണ്.