അമ്പലപ്പുഴ: ആലപ്പുഴ അമ്പലപ്പുഴ നീർക്കുന്നം ഖണ്ടകർണസ്വാമി ക്ഷേത്രത്തിന് പടിഞ്ഞാർ വശത്തുള്ള റെയിൽവേ ട്രാക്കിൽ ട്രെയിൻ തട്ടി ഒരാൾ മരിച്ചു. ഇന്ന് (ബുധനാഴ്ച) പകൽ 11:45-ഓടെയാണ് അപകടം നടന്നതെന്നാണ് വിവരം.
മരിച്ചയാളെ ഇതുവരെ തിരിച്ചറിയാൻ സാധിച്ചിട്ടില്ല. നീർക്കുന്നം ഭാഗത്ത് റെയിൽവേ ട്രാക്ക് മുറിച്ചുകടക്കുന്നതിനിടെയോ മറ്റോ ട്രെയിൻ തട്ടിയതാകാമെന്നാണ് പ്രാഥമിക നിഗമനം. വിവരമറിഞ്ഞ് നാട്ടുകാരും പോലീസും സ്ഥലത്തെത്തിയിട്ടുണ്ട്.
മൃതദേഹം ഇൻക്വസ്റ്റ് നടപടികൾ പൂർത്തിയാക്കിയ ശേഷം ആലപ്പുഴ മെഡിക്കൽ കോളേജ് ആശുപത്രി മോർച്ചറിയിലേക്ക് മാറ്റും. മരിച്ചയാളെ തിരിച്ചറിയാനുള്ള ശ്രമങ്ങൾ പോലീസ് ഊർജ്ജിതമാക്കിയിട്ടുണ്ട്.