പത്തനംതിട്ട: വിനോദസഞ്ചാര കേന്ദ്രമായ ഗവിയിൽ അങ്കണവാടി ജീവനക്കാരിയെ ക്രൂരമായി കൊലപ്പെടുത്തിയ നിലയിൽ കണ്ടെത്തി. ഗവി സ്വദേശിനിയായ 32-കാരിയാണ് കൊല്ലപ്പെട്ടത്. സംഭവവുമായി ബന്ധപ്പെട്ട് ഒരാളെ പോലീസ് കസ്റ്റഡിയിലെടുത്തു.
ഇന്ന് രാവിലെ വീട്ടിൽ നിന്ന് അങ്കണവാടിയിലേക്ക് ജോലിക്ക് ഇറങ്ങിയതായിരുന്നു യുവതി. എന്നാൽ ഏറെനേരം കഴിഞ്ഞിട്ടും ജോലിസ്ഥലത്ത് എത്താതിരുന്നതിനെ തുടർന്ന് നാട്ടുകാരും സഹപ്രവർത്തകരും നടത്തിയ തിരച്ചിലിലാണ് മീനാർ മൂന്ന് ഷെഡ് വളവിന് സമീപമുള്ള വനമേഖലയിലെ തോട്ടിൽ മൃതദേഹം കണ്ടെത്തിയത്.
ക്രൂരമായ അതിക്രമമെന്ന് നിഗമനം
യുവതിയുടെ വസ്ത്രങ്ങൾ കീറിപ്പറിഞ്ഞ നിലയിലാണ് മൃതദേഹം കണ്ടെത്തിയത്. ഇത് സംഭവത്തിൽ ബലപ്രയോഗം നടന്നിട്ടുണ്ടെന്നതിന്റെ വ്യക്തമായ സൂചനയാണെന്ന് പോലീസ് പറയുന്നു. ഇതോടെ, യുവതി കൂട്ടബലാത്സംഗത്തിന് ഇരയായിട്ടുണ്ടോ എന്നതടക്കമുള്ള ഗുരുതരമായ സംശയങ്ങൾ പോലീസ് പരിശോധിക്കുന്നുണ്ട്.
മൂഴിയാർ പോലീസ് കേസെടുത്ത് അന്വേഷണം ആരംഭിച്ചു.
സംശയിക്കുന്ന ഒരാളെ പോലീസ് കസ്റ്റഡിയിലെടുത്തിട്ടുണ്ട്. ഇയാളെ വണ്ടിപ്പെരിയാർ പോലീസ് സ്റ്റേഷനിലെത്തിച്ച് ഉന്നത പോലീസ് ഉദ്യോഗസ്ഥരുടെ നേതൃത്വത്തിൽ ചോദ്യം ചെയ്തുവരികയാണ്.
പോസ്റ്റ്മോർട്ടം റിപ്പോർട്ട് ലഭിച്ചാലുടൻ മാത്രമേ മരണകാരണം, ബലാത്സംഗം ഉൾപ്പെടെയുള്ള കാര്യങ്ങളിൽ കൂടുതൽ വ്യക്തത വരികയുള്ളൂ എന്ന് പോലീസ് അറിയിച്ചു.
സംഭവത്തിൽ സമഗ്രമായ അന്വേഷണം ആവശ്യപ്പെട്ട് നാട്ടുകാരും പ്രതിഷേധത്തിലാണ്. വനമേഖലയോട് ചേർന്നുള്ള പ്രദേശം ആയതിനാൽ സംഭവത്തിൽ കൂടുതൽ ആളുകൾ ഉൾപ്പെട്ടിട്ടുണ്ടോ എന്നും പോലീസ് പരിശോധിക്കുന്നുണ്ട്.