ബെംഗളൂരു: ഗുഡ്സ് ഓട്ടോയിലിടിച്ച സ്കൂട്ടറിൽനിന്ന് തെറിച്ചുവീണ് നാലു വയസ്സുകാരനായ മലയാളി ബാലന് ദാരുണാന്ത്യം. മലപ്പുറം കോട്ടക്കൽ പറപ്പൂർ കിഴക്കേകുണ്ട് ചാലിൽ വീട്ടിൽ എം.സി. ആദിലിന്റെ മകൻ ഈസ ആദിൽ ആണ് മരിച്ചത്.
ബുധനാഴ്ച രാവിലെ ബെംഗളൂരു സർജാപുരയിലായിരുന്നു അപകടം. നഴ്സറിയിൽനിന്ന് മകനെ തിരികെ വീട്ടിലേക്ക് സ്കൂട്ടറിൽ കൊണ്ടുവരവേ, മാതാവ് ഷഹീബ ഓടിച്ച സ്കൂട്ടർ ഗുഡ്സ് ഓട്ടോയുടെ പിന്നിൽ ഇടിക്കുകയായിരുന്നു. അപകടത്തിൽ ഗുരുതരമായി പരിക്കേറ്റ മാതാവ് ഷഹീബയെ വർത്തൂരിലെ സ്വകാര്യ ആശുപത്രിയിൽ പ്രവേശിപ്പിച്ചു.
അത്തിബലെ ഓക്സ്ഫഡ് മെഡിക്കൽ കോളേജ് ആശുപത്രിയിൽ പോസ്റ്റ്മോർട്ടത്തിന് ശേഷം, മൃതദേഹം ഓൾ ഇന്ത്യ കെഎംസിസി പ്രവർത്തകരുടെ സഹായത്തോടെ ഇന്ന് നാട്ടിലേക്ക് കൊണ്ടുപോകും. പറപ്പൂർ സിദ്ദിഖ് ജുമാ മസ്ജിദിലാണ് കബറടക്കം. പിതാവ് ആദിൽ ബെംഗളൂരുവിൽ ഐടി കമ്പനി ജീവനക്കാരനാണ്.