കോഴിക്കോട്: പുതുപ്പാടി അടിവാരം കമ്പിവേലിമ്മലിൽ ഭർത്താവിന്റെ വെട്ടേറ്റു ഭാര്യക്ക് ഗുരുതര പരിക്ക്. കമ്പിവേലിമ്മൽ സ്വദേശി ഖദീജയ്ക്കാണ് (50) തലയ്ക്ക് വെട്ടേറ്റത്. സംഭവത്തിൽ ഭർത്താവ് പാലക്കാട് സ്വദേശി ഇബ്രാഹീമിനെതിരെ (55) പോലീസ് കേസെടുത്ത് അന്വേഷണം. ആരംഭിച്ചു.
ഇന്ന് രാവിലെ 10 മണിയോടെയാണ് സംഭവം നടന്നത്. വീട്ടിലെ അടുക്കളയിൽ ഉപയോഗിക്കുന്ന കത്തി ഉപയോഗിച്ചാണ് ഇബ്രാഹീം ഭാര്യയെ ആക്രമിച്ചത്. ആക്രമണത്തിൽ ഖദീജയുടെ വലതുഭാഗത്ത് ചെവിക്കു മുകളിലായി ഗുരുതരമായി മുറിവേറ്റു.
വീട്ടിൽ വെച്ച് ഇവർ തമ്മിൽ സ്ഥിരമായി പ്രശ്നങ്ങൾ നടക്കാറുണ്ടെന്ന് നാട്ടുകാർ പറയുന്നു. മുൻകോപക്കാരനായ ഇബ്രാഹീം മുൻപും പലതവണ വഴക്കുകൾ ഉണ്ടാക്കിയിരുന്നതായും അയൽവാസികൾ ആരോപിച്ചു.
സംഭവം നടന്ന ഉടൻ തന്നെ ഖദീജയെ താമരശ്ശേരി താലൂക്ക് ആശുപത്രിയിൽ എത്തിച്ചു. പ്രാഥമിക ശുശ്രൂഷകൾ നൽകിയ ശേഷം വിദഗ്ധ ചികിത്സയ്ക്കായി ഇവരെ കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റി. സംഭവത്തിൽ പോലീസ് തുടർനടപടികൾ സ്വീകരിച്ചു വരുന്നു.