കൊച്ചി: കനത്ത മഴയ്ക്കും ഇടിമിന്നലിനുമിടെ ഏലൂരിൽ ജനവാസ മേഖലയ്ക്ക് മുകളിലേക്ക് 11 കെ.വി വൈദ്യുതി ലൈൻ പൊട്ടിവീണു. വ്യാഴാഴ്ച പുലർച്ചെ 12:30-ഓടെ ഏലൂർ പുതിയ റോഡ് മേഖലയിലാണ് അപകടമുണ്ടായത്. പ്രദേശത്തെ വീടുകൾക്കും വാണിജ്യ സ്ഥാപനങ്ങൾക്കും മുകളിലേക്കാണ് ലൈൻ വീണത്.
എന്നാൽ, ലൈൻ പൊട്ടിയ ഉടൻ തന്നെ വൈദ്യുതി ബന്ധം സ്വയം വിച്ഛേദിക്കപ്പെട്ടത് (ഓട്ടോമാറ്റിക് പവർ കട്ട്) വലിയൊരു ദുരന്തം ഒഴിവാക്കി. സംഭവത്തിൽ ആർക്കും പരിക്കുകളോ മറ്റു നാശനഷ്ടങ്ങളോ റിപ്പോർട്ട് ചെയ്തിട്ടില്ല.
വിവരമറിഞ്ഞ് കെ.എസ്.ഇ.ബി ഉദ്യോഗസ്ഥരും ഫയർഫോഴ്സും സ്ഥലത്തെത്തി അപകടാവസ്ഥയിലായിരുന്ന ലൈനുകൾ നീക്കം ചെയ്തു. അറ്റകുറ്റപ്പണികൾ പൂർത്തിയാക്കി പ്രദേശത്തെ വൈദ്യുതി വിതരണം വേഗത്തിൽ സാധാരണ നിലയിലാക്കുമെന്ന് അധികൃതർ അറിയിച്ചു.