കൊച്ചി: ഫോർട്ട് കൊച്ചിയിൽ മദ്യപിക്കാൻ പണം നൽകാത്തതിന്റെ പേരിൽ അമ്മയെ മകൻ ചവിട്ടിക്കൊന്നു. അമരാവതി തോട്ടുപീടിക ഭാഗത്ത് ലക്ഷ്മി (65) ആണ് കൊല്ലപ്പെട്ടത്. സംഭവത്തിൽ മകൻ കണ്ണനെ പൊലീസ് കസ്റ്റഡിയിൽ എടുത്തു.
നിരന്തരം മദ്യപിക്കുന്നതിനായി കണ്ണൻ അമ്മ ലക്ഷ്മിയോട് പണം ആവശ്യപ്പെടാറുണ്ടായിരുന്നു. സംഭവദിവസം പകലും ഇയാൾ പണത്തിനായി അമ്മയെ സമീപിച്ചിരുന്നു. എന്നാൽ കയ്യിൽ പണമില്ലെന്ന് പറഞ്ഞ് ലക്ഷ്മി പണം നൽകാൻ തയ്യാറായില്ല. തുടർന്ന് വൈകുന്നേരത്തോടുകൂടി കടുത്ത മദ്യലഹരിയിൽ വീട്ടിലെത്തിയ ഇയാൾ വീണ്ടും അമ്മയുമായി തർക്കത്തിലേർപ്പെടുകയും ക്രൂരമായി മർദ്ദിക്കുകയും ചവിട്ടുകയുമായിരുന്നു. മർദനത്തിൽ ഗുരുതരമായി പരിക്കേറ്റ ലക്ഷ്മി സംഭവസ്ഥലത്തുവെച്ചുതന്നെ മരണപ്പെട്ടു.