എറണാകുളം മുവാറ്റുപുഴ : കദളിക്കാടുണ്ടായ ബൈക്കപകടത്തിൽ വിദ്യാർഥി മരിച്ചു. മണക്കാട് പഞ്ചായത്തംഗം അരിക്കുഴ തരണിയിൽ ടോണി കുര്യാക്കോസിന്റെ മകൻ അലൻ (22) ആണ് മരിച്ചത്. തിങ്കളാഴ്ച രാത്രി എട്ടിന് കദളിക്കാട് ഹൈറേഞ്ച് ടൈൽസിനു മുമ്പിലായിരുന്നു അപകടം. ടൈൽസ് കടയുടെ മുമ്പിൽ മൂവാറ്റുപുഴയ്ക്കുള്ള ദിശയിൽ വഴിയരികിൽ നിർത്തിയിട്ടിരുന്ന തടിലോറിയുടെ പിന്നിൽ അലൻ സഞ്ചരിച്ച ബൈക്ക് ഇടിക്കുകയായിരുന്നു. റോഡിൽ തലയിടിച്ചുവീണ അലനെ നാട്ടുകാർ തൊടുപുഴയിലെ സ്വകാര്യ ആശുപത്രിയിൽ എത്തിച്ചെങ്കിലും രക്ഷിക്കാനായില്ല.തടിലോറി അപകടകരമായ വിധത്തിൽ റോഡിലേക്ക് ഇറക്കിയാണ് നിർത്തിയിട്ടിരുന്നതെന്നും ഭാരവണ്ടികളിൽ നിഷ്കർഷിച്ചിട്ടുള്ള ചുവപ്പുവെളിച്ചം ലോറിയിൽ ഉണ്ടായിരുന്നില്ലെന്നും പ്രദേശവാസികൾ പറഞ്ഞു.യു.കെ.യിൽ ഉപരിപഠനം നടത്തുകയായിരുന്ന അലൻ അവധിക്ക് എത്തിയതായിരുന്നു. പൊൻമുടി കദളിക്കാട്ടിൽ കുടുംബാംഗം അമ്പിളിയാണ് മാതാവ്. സഹോദരൻ അലക്സ്.