തൃശ്ശൂര്: പുതുക്കാട് റെയില്വേ ഗേറ്റില് നിര്ത്തിയിട്ട സ്വകാര്യ ബസ് ബ്രേക്ക് നഷ്ടപ്പെട്ട് പുറകിലേക്കിറങ്ങി അഞ്ച് ഇരുചക്രവാഹനങ്ങളിലൂടെ കയറിയിറങ്ങി. ഇന്ന് രാവിലെ ഗേറ്റ് തുറക്കുന്നതിന് വേണ്ടി കാത്തുനിന്ന ഇരുചക്രവാഹനങ്ങളിലൂടെയാണ് ബസ് കയറിയിറങ്ങിയത്. ബസ് വരുന്നത് കണ്ട് പുറകില് നിന്നിരുന്ന വാഹനയാത്രക്കാര് ഓടിമാറിയതുമൂലം വൻ അപകടം ഒഴിവായി. രണ്ട് മീറ്ററോളം പുറകിലേക്ക് ഇറങ്ങിയ ബസ് ഇരുചക്രവാഹനങ്ങള് അടിയില്പെട്ടതോടെ നില്ക്കുകയായിരുന്നു.
വാഹനങ്ങള് റോഡിലിട്ട് ഓടിമാറുന്നതിനിടെ രണ്ട് പേര്ക്ക് പരിക്കേറ്റു. പരിക്കേറ്റവര് പുതുക്കാട് താലൂക്ക് ആശുപത്രിയില് ചികിത്സ തേടി. ചേര്പ്പില് നിന്ന് പുതുക്കാട്ടേക്ക് വരികയായിരുന്ന ഭുവനേശ്വരിയമ്മ എന്ന ബസാണ് അപകടത്തിനിടയാക്കിയത്. കയറ്റമുള്ള ഭാഗത്ത് ഗേറ്റിനോട് ചേര്ന്ന് നിര്ത്തിയിട്ടിരുന്ന ബസ് പെട്ടെന്ന് പുറകിലേക്ക് ഇറങ്ങുകയായിരുന്നു. ഈ സമയത്ത് ബസിന് പുറകിലായി നിരവധി വാഹനങ്ങളാണ് കാത്തുനിന്നിരുന്നത്.