ചാലക്കുടി: ദേശീയപാതയിലെ പോട്ട പനമ്പിള്ളി ജംഗ്ഷനിൽ നാല് വാഹനങ്ങൾ കൂട്ടിയിടിച്ച് കാറിന് തീപിടിച്ചു. ഞായറാഴ്ച ഉച്ചയ്ക്കായിരുന്നു അപകടം. അപകടത്തിൽപ്പെട്ട കാറിലെ യാത്രക്കാർ വാഹനത്തിൽ നിന്ന് ഉടൻ തന്നെ പുറത്തിറങ്ങിയതിനാൽ വൻ ദുരന്തം ഒഴിവാകുകയും ആളപായമില്ലാതെ എല്ലാവരും അത്ഭുതകരമായി രക്ഷപ്പെടുകയും ചെയ്തു.
തൃശ്ശൂർ പഴയന്നൂർ 'ശ്രീരാഗം' വീട്ടിൽ വിനോദും കുടുംബവുമാണ് കാറിലുണ്ടായിരുന്നത്. വാഹനങ്ങൾ തമ്മിൽ ശക്തമായി കൂട്ടിയിടിച്ചതിന്റെ ആഘാതത്തിലാണ് കാറിന് തീപിടിച്ചതെന്നാണ് പ്രാഥമിക നിഗമനം. അപകടത്തിന് തൊട്ടുപിന്നാലെ വിനോദും കുടുംബവും കാറിൽ നിന്ന് പുറത്തേക്ക് ഇറങ്ങി നിന്നതിനാലാണ് വലിയ അപകടം ഒഴിവായത്.
വിവരമറിയിച്ചതിനെ തുടർന്ന് ചാലക്കുടിയിൽ നിന്നും സ്ഥലത്തെത്തിയ ഫയർഫോഴ്സ് സംഘമാണ് തീ പൂർണ്ണമായും അണച്ചത്. അപകടത്തെ തുടർന്ന് ദേശീയപാതയിൽ കുറച്ചുസമയം ഗതാഗതം തടസ്സപ്പെട്ടു.