മലപ്പുറം: മലപ്പുറം ജില്ലയിൽ വീണ്ടും ഷിഗെല്ല രോഗബാധ സ്ഥിരീകരിച്ചു. ഏലംകുളം ഗ്രാമപഞ്ചായത്തിൽ രണ്ട് കുട്ടികൾക്കും രണ്ട് മുതിർന്നവർക്കും കൂടി പുതുതായി രോഗം സ്ഥിരീകരിച്ചതോടെ ജില്ലയിലെ ആകെ രോഗബാധിതരുടെ എണ്ണം ഏഴായി ഉയർന്നു.
കഴിഞ്ഞ ഒക്ടോബർ 31-ന് ഏലംകുളത്ത് നടന്ന ഒരു വിവാഹച്ചടങ്ങിൽ പങ്കെടുത്തവർക്കാണ് പ്രധാനമായും രോഗലക്ഷണങ്ങൾ കണ്ടെത്തിയത്. ചടങ്ങിൽ സംബന്ധിച്ച 114 പേരിൽ ഷിഗെല്ലയ്ക്ക് സമാനമായ ലക്ഷണങ്ങൾ റിപ്പോർട്ട് ചെയ്തിട്ടുണ്ട്. ഇവരുടെ സാമ്പിളുകൾ വിദഗ്ധ പരിശോധനയ്ക്കായി ലാബുകളിലേക്ക് അയച്ചിരിക്കുകയാണ്.
പുതുതായി രോഗം ബാധിച്ച നാല് പേരെയും പെരിന്തൽമണ്ണ താലൂക്ക് ആശുപത്രിയിൽ പ്രവേശിപ്പിച്ചു. ഇവരുടെ ആരോഗ്യനില നിലവിൽ തൃപ്തികരമാണെന്നും ആശങ്കപ്പെടേണ്ട സാഹചര്യമില്ലെന്നും താലൂക്ക് ആശുപത്രി അധികൃതർ അറിയിച്ചു.
പ്രദേശത്ത് നിലവിൽ ഭയപ്പെടേണ്ട സാഹചര്യമില്ലെങ്കിലും ആരോഗ്യവകുപ്പ് മുൻകരുതൽ നടപടികളും ജാഗ്രതയും ശക്തമാക്കിയിട്ടുണ്ട്. രോഗം കൂടുതൽ ആളുകളിലേക്ക് പടരുന്നത് തടയാനായുള്ള പ്രതിരോധ പ്രവർത്തനങ്ങൾ ആരോഗ്യപ്രവർത്തകരുടെ നേതൃത്വത്തിൽ ഊർജ്ജിതമായി നടന്നു വരികയാണ്.